ჩატურანგა დანდასანა  წარმოადგენს მზის მისალმების მეოხე პოზიციას და ხშირად მეორდება აშთანგა ვინიასა იოგაში. ის უპირველესად სხეულის გამკვრივებისთვის და გაძლიერებისთვის არის განკუთვნილი. 

მათთვის, ვინც არასაკმარის ძალას ფლობს  ეს პოზა შედარებით რთული შესასრულებელია, მაგრამ, მიუხედავად ამისა, უნდა ვაკეთოთ ისე, როგორც შეგვიძლია მანამ, სანამ სხეულს სათანადოდ არ გავაძლიეებთ. მთავარია, გავიაზროთ სწორი შესრულება.

1. მენჯი არ უნდა იყოს ამოზნექილი.

ეს ზრდის დატვირთვას წელის მალებზე, არასწორად ანაწილებს წონას და მუცლის კუნთებიც პასიურია (ეფექტი გაცილებით ნაკლებია).

2. მუცელი და ნეკნები შეზნექილია შიგნით.

ეს არის ამ პოზის საკვანძო ძალისმიერი მომენტი, რაც დატვირთვას კიდურებზე ანაწილებს, ხოლო შუაწელის და მუცლის კუნთებს ამკვრივებს. სწორი შესრულების დროს მუცლის კუნთები კარგად უნდა მუშაობდეს, თუ მუცლის კუნთები ძლიერ არის დაჭიმული — ეს სწორი შესრულების ნიშანია.

3. მხრები გაშლილია და იდაყვები ვიწროდ არის მიმართული.

• იდაყვები მივმართოთ შიგნით;
• მხრები წავიღოთ ყურების საპირისპიროდ;
• ლავიწის ძვლები გავშალოთ;
• ბეჭები ერთმანეთს მივუახლოვოთ;

4. იდაყვის სახსრის პრობლემა

მესამე სურათზე გვერდიდან ნაჩვენებია სწორი და არასწორი შესრულება. როდესაც იდაყვის სახსარი მახვილ კუთხეს ქმნის,  ხდება სახსარზე „ჩამოკიდება". ხანდახან ასე იმიტომ ასწავლიან, რომ გაუადვილონ პრაქტიკა, სინამდვილეში კი ეს არასწორი შესრულებაა და იდაყვის სახსრისთვის და მისი შემაერთებელი ქსოვილებისთვის  არ არის სასურველი. არასწორი შესრულების დროს საჯდომი მაღლა რჩება,  ჩასვლის პროცესი სწრაფია და შემკავებელი ფაქტორი იდაყვზე „დარტყმაა".

სწორი შესრულების მომენტში ტანი იატაკის პარალელური უნდა იყოს, ხოლოდ იდაყვის სახსარი 90 გრადუსიან კუთხეს უნდა ქმნიდეს. ამისთვის საჭიროა წონა ხელის თითებისკენ გადავიტანოთ.

გამარტივებული ვარიანტი

დაბლა ჩასვლამდე იატაკს მუხლებით შეეხეთ და ეცადეთ, მუცელი და მკერდი ჰაერში აწეული დატოვოთ.