როდესაც ასანას შესრულება შეუძლებელია, ხშირად იოგები ამის მიზეზად მოქნილობას ასახელებენ, თუმცა ბენი კლარკის ახსნის მიხედვით, იოგას ერთი პოზა არ შეესაბამება ყველას. საჭიროა ვიცოდეთ საკუთარი ანატომიის უნიკალურობა, რათა შევძლოთ იმ მიზეზების განსაზღვრა, რომელიც ხელს გვიშლის გარკვეული პოზების შესრულებაში.
აკვიატებული სელფების ხანაში საკუთარი ინდივიდუალობის ხაზგასმა საკმაოდ დამახინჯებულ და არაბუნებრივ ფორმებს იღებს. ახალი ტექნოლოგიები სულ უფრო მეტ შესაძლებლობას გვაძლევენ, რომ შევნიღბოთ საკუთარი ნაკლები, რაც გარეგნობას უკავშირდება და დავმალოთ ნამდვილი მე სხვადასხვა ფილტრების მიღმა. როდესაც თქვენ ცდილობთ შეასრულოთ ყველაზე გამორჩეული —„მოცეკვავის პოზა“ და თქვენი ფეხის თითი ვერ წვდება თავის გვირგვინს, ეს რეალობა გვაიძულებს, რომ აღმოვაჩინოთ მიზეზი იმისა, თუ რატომ ვერ ვაკეთებთ ამ პოზას, რაც დაკავშირებულია ქსოვილების და ძვლების სტრუქტურასთან. თქვენს სხეულს უბრალოდ არ შეუძლია ამის შესრულება.
ეს არ ნიშნავს თქვენს მოუქნელობას ან არა „იოგურობას“, ეს ნიშნავს, რომ თქვენ ადამიანი ხართ. ეს არის ჯანსაღი შეხსენება იმის, რომ ჩვენ ყველანი განვსხვავდებით. „შენ ხარ განსაკუთრებული და ეს განსაკუთრებულობა ქმნის განსხვავებას იმაში, რისი გაკეთებაც შეუძლია „ყველას“ და რაც შეგიძლია შენ. იოგაში არ არსებობს პოზა, რომლის გაკეთებაც შეუძლია ყველას და ასევე არავის შეუძლია ყველა პოზის გაკეთება“ აღნიშნავს ბენი კლარკი „your body, your yoga-ში.
შენი ანატომია არის უნიკალური - შეისწავლე ის
ყველა საზოგადოება არ არის მზად მიიღოს კომპლექსურობა, რომელიც იქმნება განსხვავებულობისა და უნიკალურობისაგან. მასწავლებლისათვის, რომელიც უძღვება ხუთ სტუდენტიან ჯგუფს, მარტივია თითოეული სტუდენტის საჭიროების დაკმაყოფილება, მაგრამ როდესაც ჯგუფი იზრდება საჭიროებების რაოდენობაც მატულობს. უსაფრთხოების ნორმების უგულვებელყოფამ კი შეიძლება მძიმე შედეგები გამოიწვიოს გაკვეთილზე. შენ შესაძლოა მიისწრაფი უფრო დამყოლი სხეულისკენ და ამასობაში გეშინია, რომ ვერ შეასრულებ ნამდვილ პოზას, გვერდზე გადგები და თავს მიიჩნევ არასრულფასოვნად.
„განსხვავებულობა არ ნიშნავს ნაკლოვანებას“ — ბენი კლარკი გვამხნევებს გენეტიკოსი თეოდორიუს დობრანსკის ციტატით, რომელიც ეხება უნიკალურობის გათავისებას. „რატომ ფიქრობ რომ, რადგან სხვას არ შეუძლია რაღაცის გაკეთება, შენც არ გამოგივა? არსებობს რაღაცეები რისი გაკეთებაც შენ ახლავე შეგიძლია, ან შეძლებ გარკვეული დროის შემდეგ და არსებობს რაღაცეები, რასაც ვერასდროს გააკეთებ“.
თუ შენ ხარ საკმარისად დაინტერესებული, შენ შეძლებ საკუთარი სხეულის უნიკალური მექანიზმის გაგებას. მასწავლებლების უმეტესობა ვერასდროს შეძლებს შენზე უკეთ გაიგოს შენი სხეულის თავისებურებები.
ზედმეტად მოწადინებულმა მასწავლებელმაც კი შესაძლოა მცდარი გადაწყვეტილება მიიღოს , რომელიც ზიანის მომტანი იქნება თქვენთვის. ამიტომ აუცილებელია იოგას პრაქტიკის დროს პასუხისმგებლობა აიღოთ საკუთარ თავზე როგორც სახლში, ასევე იოგას კლასში. ეს გიბიძგებთ უკეთ შეისწავლოთ საკუთარი ძლიერი და სუსტი მხარეები, შეზღუდვები და სხვა უნარები.
რა გაჩერებს?
კლარკი გვთავაზობს საკუთარი ფიზიკური შეზღუდვების განსაზღვრის ეფექტურ გზას, რომელიც გვხვდება იოგას პოზების სისტემატიური შესრულების დროს. ის ხელმძღვანელობს ამ აღმოჩენას შეკითხვით: „რა გაჩერებს?“ სხვა სიტყვებით რომ ვთქვათ: რა ზღუდავს თქვენს მოქნილობას?
კლარკი გამოყოფს ორ შემდეგ მიზეზს: პირველი არის დაძაბულობა, რომლის დროსაც ქსოვილები (კუნთები, იოგები, ფასცია) არის დაჭიმული. ხოლო მეორე მიზეზი არის კომპრესია, სადაც გამოარჩევენ სამ ხარისხს: 1) მძიმე კომპრესია — ძვლის ზეწოლა ძვალზე; 2) საშუალო კომპრესია — კუნთოვანი ქსოვილის ზეწოლა ძვლოვან ქსოვილზე; 3) მსუბუქი კომპრესია — კუნთოვანი ქსოვილის ზეწოლა კუნთოვან ქსოვილზე.
ასე რომ, თუ ყურადღებას მიაქცევთ დაჭიმულობისა და კომპრესიის შეგრძნებებს იოგას პრაქტიკისას, თქვენ შეძლებთ აღმოაჩინოთ თქვენი ანატომიის უნიკალურობა და შეზღუდვები. ეს შესაძლებლობას მოგცემთ იმუშაოთ საკუთარ სხეულთან, წინააღმდეგობის გაწევის ნაცვლად. ამ პროცესის გასაადვილებლად კლერკმა შეისწავლა დაჭიმულობის და კომპრესიის დროს განვითარებული შეგრძნებები, რომელიც აღწერილია მის წიგნში. ის გამოყოფს სამ ძირითად პოზას, რომლის შესრულებაც იოგებს უჭირთ.
უკანზნექი
თქვენი მოძრაობის მაქსიმალური დიაპაზონი განისაზღვრება მომენტით, როდესაც ძვლები ეხება ერთმანეთს ან მათ შორის იჭიმება ქსოვილები. მაგალითისთვის განვიხილოთ წელის მალების ანატომიის ორი შემთხვევა. ცხადია, ადამიანი, რომელიც არის ფოტოს (1.40) მარცხენა მხარეს, დავარქვათ მას პირობითად „მოუქნელი-სტივი", ვერ შეძლებს ხერხემლის ისე გაზნექვას, როგორც ფოტოს მარჯვენა მხარეს გამოსახული ადამიანი, სახელად — „მოქნილი-ფლორა“, ყველა დანარჩენი მონაცემი თანაბარია. [დააკვირდით მალების ფორმას და სისქეს].
ჩაჯდომა
რა გიშლით ხელს ამ პოზის შესრულებაში? კოჭ-წვივის სახსრის მაქსიმალური მოხრა ხორციელდება, როდესაც მუხლი ბოლომდე არის გაწეული წინ, ხოლო ქუსლი არის მიწაზე (B პოზა). ბევრი სტუდენტისთვის უფრო მოსახერხებელია ასეთ დროს ქუსლის აწევა, რაც ამარტივებს კოჭ-წვივის სახსრის მოხრას (C პოზა). D პოზიციაში კი დორსალური მოხრა ნაკლებად არის გამოხატული, თუმცა მაქსიმალურად იჭიმება ბარძაყების კუნთები. ეს უკანასკნელი პოზიცია შესაძლოა სულაც არ იყოს დაკავშირებული კოჭის სახსრების მაქსიმალურ მოხრასთან.
სამკუთხედის პოზა
თეძოს კუნთების განზიდვის ორი გზა არსებობს (ფეხის განზიდვა სხეულის შუახაზიდან). ამ პოზის შესრულების დროს შესაძლებელია, როგორც ბარძაყის, ასევე მენჯის ძვლის მოძრაობა. პირველი სურათში ნაჩვენებია იოგინი, რომლსაც აქვს დიდი სივრცე ბარძაყების განზიდვისთვის და ამავდროულად ხერხემალს ინარჩუნებს გამართულად. B სურათში ნაჩვენებია სტრატეგია, რომლის დროსაც შეუძლებელია ბარძაყების მაქსიმალურად განზიდვა, მაგრამ აღინიშნება ხერხემლის ლატერალური დაჭიმვა. C სურათზე ჩვენ ვხედავთ კიდევ ერთ სტრატეგიას, სადაც აღინიშნება თეძოს დაჭიმულობა, რომელიც აძლევს მენჯის ძვლებს ბარძაყისკენ როტაციის საშუალებას. ხოლო D სურათში ნაჩვენებია მდგომარეობა, როდესაც თქვენ არ შეგიძლიათ განზიდვა და ფეხზე ხელის დაყრდნობით ან სავარჯიშო ბლოკის გამოყენებით ასრულებთ ამ პოზას.
