თუ ხერხემლის ამ საიდუმლოებას გავიაზრებთ კობრას პოზის მაგალითზე, მაშინ ბევრი ასანას პრინციპი ნათელი გახდება.
სწორი ვარჯიში სასარგებლოა და სასიამოვნოც. ხერხემალი ყველაზე მნიშვნელოვანი სახსრების სისტემაა.
კობრას პოზაში ფეხებიც და მენჯიც იატაკზე დაფიქსირებულია, მისი ამოცანა არ მდგომარეობს ტანის რაც შეიძლება მაღლა აწევაში, არამედ ხერხემლის თანაბარ და სწორ გაზნექაში ანუ გაშლაში.
რა განსხვავებაა ხერხემლის გაშლასა და აწევას შორის?
აწევისთვის წარმოვიდგინოთ, რომ ხერხემალი ჯოხია, რომელიც ერთიანად იწევა, ხოლო გაშლისას კი ხერხემალი თოკს შევადაროთ: თოკის აწევისას მხოლოდ ერთი ნაწილი იწევა და ასე მიყვება თანმიმდევრულად ანუ კისრის, მკერდის და წელის მალები სათითაოდ და ყველა ერთად მოძრაობს ერთმანეთის მიმართ.
აქ უნდა გავაცნობიეროთ ხერხემლის არტიკულაციის ცნება. მეტყველების დროს ყველა ბგერა მკაფიოდ უნდა გამოვთქვათ. ცალკეულ ელემენტს აქვს თავისი დამოუკიდებელი საზრისი, მაგრამ ისინი ერთიანობასაც ქმნიან. სწორედ ასევე ხერხემლის არტიკულაცია ამ გაზნექის დროს ნიშნავს, რომ თითოეული მალა უნდა ვიგრძნოთ შეძლებისდაგვარად იზოლირებულად. ჯერ კისერი ან კისრის თითოეული მალა შევიგრძნოთ და დავუკვირდეთ, შესაძლებელია თუ არა, აქ უფრო მეტი გაშლა, ხოლო შემდგომ მკერდის და წელის მალებს სათითად გადავავლოთ თვალი, შემდგომ კვლავ კისერს დავუბრუნდეთ და ასე ვაკონტროლოთ ხერხემლის ცალკეული ნადრეკებიც და მთლიანობაც. ხერხემლის გულმკერდის ნადრეკი შედარებით უძრავი ნაწილია, ამიტომ აქ მეტი ძალისხმევა გადაიტანეთ, შეეცადეთ, სწორედ აქ გაიშალოთ ყველაზე მეტად. თუ კობრას პოზაში ტანს ასე არ ავწევთ და მის აწევას ჯოხივით შევეცდებით, მაშინ ზურგის დაჭიმული კუნთები პირიქით იმოქმედებს და ხელს შეუშლიან აწევას.
მაშ, როგორ უნდა ავიწიოთ თუ კუნთებს არ დავჭიმავთ?
აქ გვჭირდება მეორე ცნების გააზრება, რომ არსებობს ზედაპირული და ღრმა კუნთები. ღრმა კუნთები ხერხემლის გაყოლებაზეა და მის გაზნექას და არტიკულაციას ხელს უწყობს. ღრმა კუნთები ერთმანეთთან აკავშირებს ცალკეულ მალებს და ამოძრავებენ ერთმანეთის მიმართ.
ზედაპირული კუნთები კი ხერხემალს აშეშებს. ესენია, მაგალითად, რომბისებრი კუნთები, ზურგის უგანიერესი კუნთები, ტრაპეციები და ა.შ. ისინი განლაგებულია არა ხერხემლის გასწვრივ, არამედ ჰორიზენტალურად, ზურგის გვერდების მიმართულებით.
ეს კუნთები ზურგის დიდ ზონებს ფარავენ და აერთიანებენ. მათი გამოყენება მნიშვნელოვანია, როცა, მაგალითად, სიმძიმეს ვწევთ და გვინდა, რომ ხერხემალი დაფიქსირდეს უძრავად. მაშასადამე, კობრას პოზაში და ყველა იმ პოზაში, სადაც ხერხემლის გაშლა გვსურს საჭიროა მათი მოდუნება. ვინაიდან ეს კუნთები სიმძიმის აწევაში გვეხმარება, ინსტიქტურად ბევრს ჰგონია, რომ გაშლაშიც დაეხმარება, სინამდვილეში ამის საპირისპიროდ მოქმედებს.
მაშასადამე, კობრას პოზას დროს ვპოულობთ ხერხემლის ღრმა კუნთებს, ეს რომ ვიპოვოთ, დაუკვირდით შეგრძნებას, თითქოს მხოლოდ ხერხემლით იწევით, ყველა მალა იზოლირებულად იზნიქება და ზურგის სხვა კუნთები მოადუნეთ.
რაც შეეხება ხელების გამოყენებას, ხელები მხოლოდ ასეთ გაზნექას უნდა დაეხმაროს. თუ ხერხემლის რომელიმე წერტილი ზედმეტად იტვირთება, ხელებს არ უნდა დავაწვეთ ზედმეტად. იპოვეთ ხერხემლის თანაბარი გაჭიმვა.
რომ შევაჯამოთ, კობრას პოზაში უნდა მოხდეს ხერხემლის მალების არტიკულაცია, ღრმა კუნთების გამოყენებით, სხვა (ზედაპირული) კუნთების მოდუნებით და ხელების კონტროლით.