დროთა განმავლობაში თქვენ გამოიმუშავებთ საკუთარ „მიდგომებს“ წარმატებული პრაქტიკისათვის, მაგრამ, მიუხედავად ამისა, არსებობს საერთო რეკომენდაციები, რომელთა გაცნობაც ყველასათვის სასარგებლო იქნება:
- განწყობა პრაქტიკისათვის. დასაწყისისთვის დაჯექით ხალიჩაზე რამდენიმე წუთით და განეწყვეთ პრაქტიკისათვის. აუცილებელია, მოეშვათ და გადადოთ ყველა პრობლემა, რაშიც სუნთქვაზე დაკვირვება დაგეხმარებათ.
- მოთელვა. ნერვული დაძაბულობის მოსახსნელად და ასანებისთვის მოსამზადებლად მსუბუქი მოთელვა დაგეხმარებათ, რაც გულისხმობს სახსრების გახურებას ან დინამიურ ვარჯიშებს(მაგ. მზის მისალმება).
- ზომიერება. ასანების შესრულებისას არ შეიძლება სიჩქარე, არ ეცადოთ გააკეთოთ, რაც შეიძლება ბევრჯერ. მთავარი ის კი არ არის რამდენჯერ, რამდენხანს ან, რომელ პოზებს გააკეთებთ, არამედ მთავარია, თუ როგორ გააკეთებთ. თითოულ პოზაში ნელა, თანდათანობით და სრული კონტროლით უნდა შეხვიდეთ, თუნდაც დინამიურ კომპლექსს ასრულებდეთ. პოზების ბიძგებით შესრულება არ შეიძლება. იოგას ნაჩქარებად ვარჯიში სტრესის მომტანია.
- თანმიმდევრულობა. სასურველია თანმიმდევრულობის იმგვარად აგება, რომ ყოველი შემდეგი პოზა, წინა პოზის საპირისპირო იყოს (უკანზნექი შეცვალოს წინზნექმა).
- ასანა - მოხერხებული სტატიკური პოზაა. პოზა ხდება ასანა, თუ თქვენი ცნობიერება მთლიანად მასზეა კონცენტრირებული, არ არის მენტალური დაძაბულობა, ყველა ის კუნთი, რომლების ძალისმიერად არ არის დატვირთული ვარჯიშისას - მოდუნებულია.
ასანების შესრულებისას არ უნდა გიწევდეთ დიდი ძალისხმევა, არ ეცადოთ მეტისმეტად მიბაძოთ მათ, ვისაც უკეთესად გამოსდის ასანა, რათა თავიდან აიცილოთ ტრავმა. თითეულ ადამიანს მოქნილობის საკუთარი ზღვარი გააჩნია. შესაბამისად, შესრულებისას ყველა საკუთარი შესაძლებლობებიდან უნდა გამოდიოდეს. მით უფრო, რომ სარგებელი ასანიდან დამოკიდებულია არა იმაზე, თუ რამდენად, ღრმად გაიზნიქებით, არამედ რამდენად სწორად შეასრულებთ პოზებს. ხშირად, მარტივი პოზები უფრო მეტი სარგებელის მომტანია, ვიდრე ნაადრევად შესრულებული რთული პოზები. აგრეთვე, ისიც ნორმალურია თუ ხანდახან სხეული წინა ვარჯიშზე ნაკლებად მოქნილი იქნება, ასეთი რამ ხშირად ხდება, მაგრამ გახსოვდეთ, შემდგომში კვლავ უკეთესად გამოგივათ.
ერთდროულად უნდა ეცადოთ გააუმჯობესოთ პოზა და თან მთლიანად თქვენს შეგრძნებებზე იყოთ მიყურადებული. ჰათჰა-იოგაში ეს ყველაზე უფრო ძნელია. სწორი შესრულების კრიტერიუმი - ჰარმონიისა და ხალისის განცდაა, რომელიც თან უნდა ახლავდეს პრაქტიკის პროცესს.
პოზაში შესვლის დროს შეგიძლიათ თვალები დახუჭოთ, რათა უკეთ მოუსმინოთ თქვენს შეგრძნებებს და მოეშვათ.
- გადასვლა. ერთი ასანიდან მეორეში გადასვლა ნელა, რბილად და ლივლივით უნდა მოხდეს, მკვეთრი მოძრაობების გარეშე. ნელი მოძრაობები საშუალებას გაძლევთ შეინარჩუნოთ კუნთების დაუძაბველობა და გონების სიმშვიდე. ითვლება, რომ რაც უფრო ნელა შედიხართ პოზაში, მით უფრო კარგია.
- სუნთქვა. ისუნთქეთ თავისუფლად, თანაბრად და მხოლოდ ცხვირით. თუ სუნთქვა აჩქარდა, საჭიროა მისი აღდგენა რელაქსაციური პოზის მიღებით ან რამდენიმე თავისუფალი შესუნთქვა-ამოსუნთქვით. თუ გიჭირთ ცხვირით სუნთქვა, შეასრულეთ ჯალა-ნეტი (ცხვირის წყლით გამორეცხვა).
- ხანგრძლივობა. პოზაში შეყოვნების ხანგრძლივობა ინდივიდუალურია. რაც უფრო დიდხანს დაყოვნდებით, მით უკეთესია, მაგრამ დაყოვნდით პირველი უსიამოვნო შეგრძნებების გამოვლინებამდე. თუ იგრძნობთ ტკივილს, დაუყოვნებლივ გამოდით პოზიდან (თუ ეს უსიამოვნო ტკივილია, არა გაჭიმვისგან მიღებული). თუ პოზა რთულია და გიჭირთ ხანგრძლივად მასში დაყოვნება, სჯობს 2-3 მისვლა შეასრულოთ. თუ შეამჩნევთ, რომ გონება აფორიაქებულია და ცდილობს, რაც შეიძლება მალე დატოვოს პოზა, მაშინ დაითვალეთ სუნთქვის ციკლი, ყურადღების გადატანის მიზნით.
- დამხმარე საშუალებები. თუ თქვენ მოქნილობა არ გყოფნით პოზების შესასრულებლად, შეგიძლიათ დამხმარე საშუალებები გამოიყენოთ (ქამარი, აგურები, ბალიშები), ზოგ შემთხვევაში სკამიც კი. მაგრამ გახსოვდეთ, რომ დამხმარე საშუალებები დროებითია და ეცადეთ შემდგომში მათ გარეშე გაართვათ თავი.
- შავასანა. რელაქსაციის პოზა, ან სიტყვასიტყვით „გვამის პოზა“ - აუცილებლად შეასრულეთ ვარჯიშის დასასრულს.