დგომითი პოზები II: ბალანსი, მენჯ-ბარძაყის მობილობა და ძალა
რას ვისწავლით
მესამე სემინარი აგრძელებს დგომითი პოზების შესწავლას და ამატებს ახალ გამოწვევებს — უფრო ფართო დგომებს, ერთ ფეხზე ბალანსს, მენჯ-ბარძაყის უფრო ღრმა მოძრაობას და ძალის განვითარებას.
Prasārita Pādottānāsana A–D-ის ოთხ ვარიანტში განვიხილავთ, როგორ უნდა შეირჩეს დგომის სიგანე ინდივიდუალური პროპორციების მიხედვით, როგორ შევინარჩუნოთ ტერფებისა და მუხლების სწორი მიმართულება და როგორ შევასრულოთ წინ დახრა მენჯ-ბარძაყის სახსრებიდან ისე, რომ ხერხემალი თავისუფლად გრძელდებოდეს. ცალკე ყურადღებას დავუთმობთ მხრის სარტყლის მუშაობას იმ ვარიანტებში, სადაც ხელების პოზიცია იცვლება.
Pārśvottānāsana-ში ვისწავლით მენჯის გასწორებას, წონის განაწილებას ორივე ფეხზე და წინა ფეხის ტერფის, მუხლისა და ბარძაყის ერთ ხაზში ორგანიზებას. განვიხილავთ, რატომ არის მნიშვნელოვანი არ გადავიტანოთ მთელი დატვირთვა წინა ფეხზე და როგორ მუშაობს უკანა ფეხი სხეულის სტაბილიზაციაში.
Utthita Hasta Pādāṅguṣṭhāsana-ს საშუალებით ვიმუშავებთ ერთ ფეხზე ბალანსზე, ტერფის თაღების აქტიურობაზე, მენჯის სტაბილურობასა და მენჯ-ბარძაყის მომხრელი და განმზიდველი კუნთების მუშაობაზე. აქ მნიშვნელოვანი იქნება იმის გაგება, რომ ფეხის მაღლა აწევა არ უნდა ხდებოდეს ხერხემლისა და მენჯის პოზიციის დაკარგვის ხარჯზე.
Ardha Baddha Padmottānāsana-ში დეტალურად განვიხილავთ ნახევარლოტოსის უსაფრთხო ტექნიკას. მთავარი პრინციპია, რომ მოძრაობა მოხდეს მენჯ-ბარძაყის სახსარში და არა მუხლში. ვისწავლით, როგორ შევაფასოთ მზად არის თუ არა სხეული სრული პოზისთვის და რა მოსამზადებელი ეტაპები შეიძლება გამოვიყენოთ მაშინ, როდესაც მენჯ-ბარძაყის მობილობა ჯერ საკმარისი არ არის.
სემინარის ბოლოს Utkatāsana და Vīrabhadrāsana A/B-ის საშუალებით გადავიტანთ ყურადღებას ძალასა და გამძლეობაზე — ფეხების აქტიურ მუშაობაზე, მენჯის პოზიციაზე, მუცლის კუნთების სტაბილიზაციაზე და სხეულის ზედა და ქვედა ნაწილების ერთიან ორგანიზებაზე.
სემინარის მიზანია, მონაწილემ უკეთ გაიგოს, როგორ უკავშირდება ერთმანეთს ბალანსი, მობილობა და ძალა და რატომ არ უნდა განვითარდეს მოქნილობა სხეულის სტაბილურობის ხარჯზე.