შემეცნების პირველი ხარისხი: წარმოდგენა;
მეორე: ცნობიერად წარმოდგენა ანუ აღქმა (реrсіреrе);
მესამე: ცოდნა (noscere), წარმოდგენა, სხვა ნივთებთან შედარებით, როგორც მსგავსებით, ისე განსხვავებით;
მეოთხე: ცოდნა ცნობიერად ანუ შემიმეცნო (cognoscere). ცხოველებმაც იციან საგნები, მაგრამ ისინი მათ ვერ შეიცნობენ;
მეხუთე: გაგება (intelligere) ანუ ცნების მეშვეობით განსჯით შემეცნება ან კონციპირება. ეს წვდომისგან [Begreifen] საკმაოდ განსხვავებულია. ბევრის კონციპირება შეგვიძლია ჩაუწვდომლად, მაგალითად perpetuum mobile, რომლის შეუძლებლობასაც მექანიკა აჩვენებს;
მეექვსე: შეცნობა გონებით ანუ შეღწევა (perspicere). ამას მხოლოდ ცოტაოდენ საგნებში ვაღწევთ და ჩვენი ცოდნა ყოველთვის მით უფრო მცირეა რაოდენობრივად, რაც უფრო მეტად გვსურს მათი სრულყოფა შინაარსის თვალსაზრისით.
დაბოლოს, მეშვიდე: ჩაწვდომა (comprehendere) ანუ გონების მეშვეობით ან a priori რამის შეცნობა იმ ხარისხით, რაც საჭიროა ჩვენი მიზნისთვის. ვინაიდან ყოველი ჩვენი შემეცნება მხოლოდ შეფარდებითია ანუ მხოლოდ გარკვეული მიზნისთვის არის საკმარისი; უცილობლად ჩვენ ვერაფერს შევიცნობთ.
ი. კანტი, ლოგიკა